الانتخابات و الزفت

يعني بتصير اوقات انت و ماشي بالطرقات متل اي بشري ... بتحس انو في كتير اشغال: تزفيت طرقات , اشارات سير , تصليح مجارير ... الخ . للوهلة الاولى بتحس حالك بدبي اول ما اكتشفو النفط .. بتتفاءل , بتصير تسترجع احلام الشباب , انو بيت واسع و شغل منيح و كزا .. فجأة و انت مبسوط بتتزكر انو الانتخابات عالبواب .. ببلش يخطر ببالك انو من عشرين سنة قبل كل انتخابات ببلشو تزفيت .. معقول لهلأ بعدن بنفس الطرق عم يخلو العالم تنتخبن ..بتسود الدني بوجك , و بتعرف انو بعد في كتير قدامنا . بتضطر تشيل كل علامات البسط من وجك ... و بتروح بتنام ..

تغيير

بتصير اوقات انو مجموعة بتقرر تعمل تغيير بالمحل اللي هيّ في و تشيل كل شي قديم ..لأسباب منطقية عادة .. بتمرق ايام و سنين و هالمجموعة ما قدرت تعمل شي .. بتصير تشبه القديم اللي كانت بدا تغيرو ..
بعد كل هالسنين بتجي مجموعة تانية بتقرر تعمل تغيير .. و بتبلش تشتغل عهالاساس .. و اول ما يبلش يطلع معا شي او يبين انو رح يطلع معا شي ... بيتحول شغل المجموعة الاولى من التغيير (نظريا) لمحاولة اسقاط التغيير الجديد (عمليا ) .. بتنسى انو الهدف اللي هيي انعملت عشانو عم يتحقق .. و بتنتبه انو مش هي اللي عم تعمل التغيير ..
ما التغيير عايدكن مش الظاهر ناوي يجي ..
يعني يا عايدكن يا خلينا عالقديم ؟!
فهمونا لنفهم ...
ما اصلا ازا بدكن تعملو تغيير اول شغلة بدكن تغيروها هي انتو ....
انتو صرتو من القديم ... فيقو!